नेपाली कांग्रेसका पूर्व कार्यवाहक सभापति पूर्णबहादुर खड्कानिकट एक समूह संस्थापन पक्षले आयोजना गर्ने पार्टीको १५ औं महाधिवेशनमा सहभागी हुने भएको छ । सभापति गगन थापाले खड्का समूहले पार्टी एकताका लागि अघि सारेका ८ बुँदे माग सम्बोधन गर्न तयार भएपछि उक्त समूह महाधिवेशनमा सहभागी हुन सहमत भएको हो ।
खड्का समूहले पार्टीभित्रको विवाद समाधान तथा महाधिवेशनलाई एकताबद्ध रूपमा अघि बढाउन विभिन्न सर्त अघि सारेको थियो । ती मागमध्ये सदस्यता विवाद, निवर्तमान समितिका केन्द्रीय सदस्यको व्यवस्थापन, केन्द्रीय कार्यसम्पादन समितिमा सहभागिता तथा भ्रातृसंस्था र निर्वाचनसम्बन्धी समितिमा प्रतिनिधित्वलगायतका विषय सम्बोधन गर्ने प्रतिबद्धता सभापति थापाबाट आएपछि महाधिवेशनमा सहभागी हुने निष्कर्षमा पुगेको समूहका नेताहरूले बताएका छन् ।
समूहका नेता श्याम घिमिरेले बताएअनुसार उनीहरूले संस्थापन पक्षसँग राखेका ८ बुँदे माग पूरा गर्ने सहमति बनेपछि महाधिवेशनमा सहभागी हुने निर्णय गरिएको हो । उनका अनुसार सदस्यताको विषय यसअघि नै सम्बोधन भइसकेको छ । त्यसैगरी निवर्तमान समितिका १११ जना केन्द्रीय सदस्यलाई समेटेर लैजाने, कार्यसम्पादन समितिमा सहभागी गराउने तथा भ्रातृसंस्था र निर्वाचनसम्बन्धी समितिमा समेत सहभागिता सुनिश्चित गर्ने विषयमा पनि सभापति थापाले आश्वस्त पारेका छन् ।
खड्का समूह महाधिवेशनमा सहभागी हुने निष्कर्षमा पुगेपछि संस्थापन पक्षले आइतबार केन्द्रीय कार्यसम्पादन समितिको बैठक बोलाएको छ । बैठकबाट केन्द्रीय कार्यसमितिमा केही सदस्य मनोनयन गर्ने तयारीसमेत रहेको कांग्रेस स्रोतले जनाएको छ । यसले पार्टीभित्रको पछिल्लो शक्ति सन्तुलनमा समेत प्रभाव पार्ने देखिएको छ ।
घिमिरेका अनुसार समूहले पटक–पटक आन्तरिक छलफल गरेर महाधिवेशनमा सहभागी हुने निर्णय गरेको हो । शुक्रबार निवर्तमान समितिका ३१ जना केन्द्रीय सदस्य तथा पदाधिकारीले साझा धारणा सार्वजनिक गर्दै आफूहरू संस्थापन पक्षसँग सहकार्य गरेर अघि बढ्ने संकेत दिएका थिए ।
उनले खड्का समूहबाट करिब ४० जना निवर्तमान समितिका केन्द्रीय सदस्य महाधिवेशनमा सहभागी हुने दाबी गरेका छन् । यससँगै यसअघि पूर्वसभापति शेरबहादुर देउवाको पक्षमा देखिएको समूहभित्रै विभाजनको संकेत देखिएको छ । खड्कानिकट नेताहरूको ठूलो हिस्सा गगन थापा नेतृत्वको संस्थापन पक्षसँग उभिएपछि कांग्रेसको आगामी महाधिवेशनमा शक्ति समीकरण फेरबदल हुने सम्भावना बढेको छ ।
यद्यपि, स्वयं पूर्णबहादुर खड्का भने संस्थापन पक्षले आयोजना गर्ने महाधिवेशनमा सहभागी नहुने भएका छन् । उनी स्वयंले कांग्रेस विवादमा अदालतमा मुद्धा दायर गरेकाे कारण सहभागी नहुने भएका हुन् ।
खड्का समूहकाे निर्णयसँगै देउवा समूह भने थप दबाबमा परेकाे छ । देउवा समूहका अन्य केही नेताहरू पनि निरन्तर संस्थापन पक्षसँग संवादमा रहेका छन् ।
