कैलालीको जोशीपुर गाउँपालिकामा राष्ट्रिय खोप कार्यक्रमअन्तर्गत नियमित खोप सेवाभित्र विद्यालय केन्द्रित एच.पि.भि. (HPV) खोप अभियान सञ्चालन गर्ने उद्देश्यले पालिका खोप समन्वय समिति तथा सम्बन्धित सरोकारवालासँग अन्तरक्रिया कार्यक्रम सम्पन्न भएको छ।
कार्यक्रममा खोप अभियानको महत्व, लक्षित समूह, कार्यान्वयन प्रक्रिया तथा विद्यालय तहमा खोप सञ्चालन गर्दा अपनाउनुपर्ने सावधानीका विषयमा विस्तृत छलफल गरिएको थियो। साथै, अभियानलाई प्रभावकारी बनाउन स्थानीय तह, स्वास्थ्यकर्मी, विद्यालय प्रशासन तथा अभिभावकहरूको भूमिकाबारे समेत छलफल गरिएको जनाइएको छ।
“माघ २७ गतेदेखि अभियान सञ्चालन हुने छ। यस अभियानअन्तर्गत स्वास्थ्य शाखाले १० देखि १४ वर्ष उमेर समूहका विद्यालय नजाने किशोरी तथा कक्षा ६ मा अध्ययनरत छात्राहरूलाई लक्षित गर्दै कुल ३४० जनालाई समेट्ने लक्ष्य राखेको स्वास्थ्य शाखा प्रमुख निर्प डगौराले जानकारी दिएका थिए ।
अन्तरक्रिया कार्यक्रममा सहभागी सरोकारवालाहरूले एच.पि.भि. खोपले पाठेघरको क्यान्सरजस्ता गम्भीर रोगबाट बच्न महत्वपूर्ण भूमिका खेल्ने भन्दै अभियानलाई सफल बनाउन सबै पक्षको सहकार्य आवश्यक रहेको धारणा व्यक्त गरेका थिए।
