कैलाली । नेपाली कम्युनिस्ट पार्टी कैलाली क्षेत्र नं. १ बाट कैलालीको जानकी गाउँपालिका–४ निवासी जेन्जी युवा अखिल (क्रान्तिकारी) का कैलाली जिल्ला अध्यक्ष तपेन्द्र शाह सिफारिस भएका छन्।
पार्टीको क्षेत्रीय छलफल तथा आन्तरिक परामर्शपछि शाहलाई पार्टीको महत्वपूर्ण जिम्मेवारीका लागि सिफारिस गरिएको हो। पार्टी स्रोतका अनुसार उक्त सिफारिस प्रक्रिया आगामी केन्द्रीय निर्णयका लागि पठाइसकिएको छ भने अन्तिम निर्णय पार्टी नेतृत्वले गर्ने जनाएको छ।
शाह २०७२ सालमा टिकापुरस्थित वीरेंद्र विद्यामन्दिरमा कक्षा ११ मा अध्ययनरत रहँदा अखिल (क्रान्तिकारी) मा संगठित भएका थिए। त्यसयता उनी लामो समयदेखि विद्यार्थी आन्दोलन तथा पार्टी संगठन निर्माणमा सक्रिय रहँदै आएका छन्। विद्यार्थी संगठन र पार्टी संगठनलाई मजबुत बनाउन उनले खेलेको भूमिकाका कारण पार्टीभित्र उनी एक प्रतिबद्ध, क्रियाशील तथा संगठनात्मक क्षमता भएका नेताका रूपमा परिचित छन्।
उनको सिफारिसले नेपाली कम्युनिस्ट पार्टी कैलाली क्षेत्र नं. १ मा पार्टी गतिविधि थप सशक्त र गतिशील हुने अपेक्षा गरिएको छ।
