भजनी नगरपालिकाले इलाका प्रशासन कार्यालय भजनीमा स्थापना गर्न नेपाल सरकार गृह मन्त्रालयमार्फत गरेको अनुरोधप्रति कैलारी गाउँपालिकाले पत्रचार गर्दै ध्यानाकर्षण गराएको छ।
भजनी नगरपालिकाको चलानी नम्बर २७०, मिति २०८२ भदौ १३ गतेको पत्रअनुसार भजनी नगरपालिका, जोशीपुर गाउँपालिका र कैलारी गाउँपालिकाका नागरिकलाई सेवा प्रवाह सहज बनाउन ईलाका प्रशासन कार्यालय भजनीमा स्थापना गर्न पहल गरिएको हो।
कैलारी गाउँपालिकाले यस प्रस्तावप्रति सकारात्मक धारणा व्यक्त गर्दै भनेको छ कि नागरिकलाई सहज र प्रभावकारी सेवा प्रवाह हुनु आवश्यक छ। तर गाउँपालिकाले स्पष्ट पारेको छ कि कैलारीका नागरिकहरूका लागि हालको अवस्थामा सेवा, पहुँच, र प्रशासनिक सुविधाको दृष्टिले जिल्ला प्रशासन कार्यालय धनगढी नै सबैभन्दा उपयुक्त स्थान हो।
गाउँपालिकाले नेपाल सरकार र सम्बन्धित सरोकारवालाहरूलाई नागरिकको हित र समग्र सेवा प्रवाहको सन्तुलनमा ध्यान दिन आग्रह गरेको छ।
