भोज बिनाडि
टीकापुरस्थित इलाका प्रहरी कार्यालय नजिकै मंगलवार (आज) बिहान भएको दुर्घटनामा मृत्यु हुनेको सनाखत भएको छ ।
इलाका प्रहरी कार्यालय टीकापुरका डिएसपी नविन राजा बुढाथोकीका अनुसार मृत्यु हुनेमा टीकापुर नगरपालिका वडा नम्बर ६ मिलनपुर शिविरका ४५ वर्षका अतवारी चौधरी रहेका छन ।
साइकलमा सवार रहेका चौधरीलाई बिहान ९ बजे टीकापुर बसपार्कबाट लम्कीतर्फ गैरहेको सुप प्र ०१–००१–ख ३५८३ नम्बरको बसले ठक्कर दिएको थियो । बसको ठक्करबाट घाईते भएका चौधरीको उपचारको क्रममा टीकापुर अस्पतालमा मृत्यु भएको प्रहरीले जानकारी दिएको छ ।
मृतक चौधरी काठको काम गर्ने मिस्त्री रहेको बताईएको छ । उनी घरबाट काठको काम गर्ने भन्दै आएका थिए । उनले साइकलको पछाडी खाना समेत बोकेर आएको प्रहरीले बताएको छ ।
सोही घटनामा घाईते भएका मोटरसाइकल चालक २५ वर्षका राजु चौधरीलाई टीकापुर अस्पतालले थप उपचारका लागि नेपालगञ्ज रिफर गरेको छ । प्रहरीका अनुसार बसले साइकल यात्रीलाई ठक्कर दिएपछि गुडिरहेको सुप प्र ०१–१२–प १८६९ नम्बरको मोटरसाइकललाई समेत ठक्कर दिएको थियो ।
प्रहरीले बस र चालकलाई नियन्त्रणमा लगेको छ ।
