संजय महर
महेन्द्रनगर । बेलडाँडी गाउँपालिका २ सिहपाल टोलकी १७ वर्षिय सम्झना भट्ट आइतबार घरमै झुण्डिएको अवस्था फेला परिन् । भीमदत्त नगरपालिका ६ ऐंठपुर माइती घर भएकी उनको गत फागुनमा बेलडाँडीका २४ वर्षिय पवन भट्टसित विवाह भएको थियो ।
उनीहरु दुबै विद्यार्थी हुन् । सम्झना विज्ञान विषय लिएर कक्षा १२ मा पढ्दै थिइन् । उनका श्रीमान बीबीए आठांै सेमेस्टरका विद्यार्थी हुन् ।
विवाहपछि उनीहरु दुबैबीच सम्बन्धमा खटपट भएर मिलापत्रका लागि प्रहरीसम्म पुग्यो । आइतबार सम्झनाको शव भेटिन अघि उनीहरुबीच इलाका प्रहरी कार्यालय बेलडाँडीमा छलफल गरिएको थियो ।
प्रहरी कार्यालयमा छलफलपछि दुबै जना घर फर्किए । प्रहरीमा मिलापत्रपछि घर फर्किएकी सम्झना अर्को दिन झुण्डिएको अवस्थामा भेटिइन् । प्रहरीका अनुसार उनीहरु दुबैलाई सम्झाई बुझाई गरी घर पठाइएको थियो ।
मृतक सम्झनाले आइतबार आफन्तलाई श्रीमानले निरन्तर दुःख दिएको आफू बाँच्न नसक्ने आशयको सन्देश पठाएकी थिइन् । उनका आफन्तका अनुसार उनले अब बाँच्न सक्दिन भन्ने सन्देश पठाएकी थिइन् ।
सम्झनाले सन्देश पठाएपछि उनकी आमा बेल्डाँडी हिँडेको र उनले बिच बाटोमै उनले आत्महत्या गरेको जानकारी पाएको आफन्तले बताए ।
प्रहरीका अनुसार झुण्डिनु अघि उनले आफन्तसँग भिडियो कल समेत गरेकी छन् । प्रहरीले अहिले उनका श्रीमान पवनलाई पक्राउ गरी अनुसन्धान गरि रहेको छ ।
सम्झनाका आफन्तक अनुसार उनको शरिरमा निलडाम र घाउ देखिएका छन् । आफन्तले श्रीमानको यातना सहन नसकेर आत्महत्या गरेको आशंका गरेका छन् ।
सम्झनाका बुवा भोजराज भट्टले छोरीको न्यायका लागि आश गरिएको बताए । “उमेरले सानी छोरीलाई माया गर्ने र बचाउने बेला थियो, सबैले पीडा दिए। हामी अब न्यायको पर्खाइमा छौं,” उनले भने ।
जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक सागर बोहराले सोधपुछका लागि उनका श्रीमान भट्टलाई नियन्त्रणमा लिइएको बताए ।
