नेकपा एमाले कैलालीको नवौं जिल्ला अधिवेशनअन्तर्गत मतदान जारी छ।
मतदान आज बिहान ८ बजेबाट सुरू भएको हो। कैलाली जिल्लाको आगामी नेतृत्वका लागि डेजी पाण्डे, यज्ञराज ढुंगाना र दुर्गाप्रसाद जोशी प्रतिस्पर्धामा छन्। १५० सदस्यीय जिल्ला कमिटीका लागि ४८० जना प्रतिस्पर्धामा छन्। अध्यक्षमा तीन, उपाध्यक्षमा चार, सचिवमा तीन जना प्रत्यासी छन्। त्यस्तै महिला उपसचिवमा पाँच र पुरूष उपसचिवमा चारजना प्रतिस्पर्धामा छन्।
कैलालीको नवौं अधिवेशन फागुन ६ गतेबाट सुरू भएको हो। अधिवेशनमा ५ सय ९३ जना प्रतिनिधि छन्। जिल्ला कमिटिको निर्वाचनमा अहिलेसम्म ४० प्रतिसत मतदान भएको छ। मुख्य निर्वाचन अधिकृत मानबहादुर जोराका अनुसार दिउसो २ः३० बजेसम्म २४० जनाले मतदान गरेका छन्। दिउसो १ः४५ बजेसम्मका लागि मतदानको समय तोकिए पनि मतदान नसकिने देखेपछि निर्वाचन अधिकृतको कार्यालयले त्यो समय बढाएर बेलुकी ५ बजेसम्मका लागि तय गरेको छ।
निर्वाचन अधिकृतको कार्यालयले २० मतदान केन्द्र तोकेको छ। निर्वाचन कार्यालयले प्रकासित गरेको उमेदवारको नामावली अनुसार कार्यबाहक अध्यक्ष दुुर्गाप्रसाद जोशी, वर्तमान सचिव डेजी पाण्डेय र यज्ञराज ढुंगानाको प्यानल नै चुनावी मैदानमा छ। उपाध्यक्ष पदमा ६ जनाको उम्मेदवारी छ। गजेन्द्र स्वार, दलबहादुर विष्ट, मदन ओझा, वीरेन्द्रबहादुर रावल, विष्णुबहादुर चौधरी, लोकेन्द्र शाहीले उपाध्यक्षका लागि उमेदवारी दिएका छन्।
सचिवमा विष्णुकुमार चन्द, दानबहादुर विश्वकर्मा र ममताप्रसाद चौधरी गरी तीन जनाले उमेदवारी दिएका छन्। चन्द यज्ञराज ढुंगाना प्यानल, विश्वकर्मा जोशी प्यानल र चौधरी पाण्डेय प्यानलका सचिव हुन्। उपसचिवमा राजु गुरुङ, किशोर शाह, चूडामणि भट्ट, मदन रेग्मी, नृप थ्यायत खड्का, चक्रबहादुर विष्ट, भुवन रिजालको उमेदवारी परेको छ। त्यस्तै महिला उपसचिवमा रत्ना कुवर जोशी, , अम्बिका विष्ट मल्ल, गंगाकुमारी चौधरी, शान्तिदेवी सिंह र गीता चौधरी रहेका छन्। खुला, भुुगोल, विभिन्न कलस्टरमा १४५ जना सदस्य पदमा दोब्बर बढी उमेदवारी परेकाले मतदानमा ढिलाई भइरहेको छ।
