संसदीय दलको नेताबाट राजीनामा दिएको जानकारी दिंदै कांग्रेस नेता उद्वव थापा।
नेपाली कांग्रेस कोशी प्रदेशका संसदीय दलका नेता उद्धव थापाले पदबाट राजीनामा दिएका छन्। आज विराटनगरमा पत्रकार सम्मेलन गरी थापाले संसदीय दलको नेताबाट राजीनामा दिएका हुन्।
मुख्यमन्त्रीमा नियुक्त हुँदा दुई पटक अदालतको आदेशबाट पदमुक्त भएका कारण आफूले नैतिकताका आधारमा संसदीय दलको नेताबाट राजीनामा दिएको थापाको भनाई छ।
‘अदालतले मुख्यमन्त्रीमा नियुक्ति र विश्वासको मत लिँदा असंवैधानिक ठहर गरिसकेपछि पदबाट राजीनामा दिन उचित हुने ठानेर राजीनामा दिएको हुँ’ थापाले भने ‘कसैप्रति मेरो आग्रह वा पूर्वाग्रह छैन।’
थापाले मुख्यमन्त्रीमा नेपाली कांग्रेसका सांसद केदार कार्की नियुक्त भएको विषय र संसदीय दलको नेताबाट राजीनामा दिने निर्णय गरेको विषय संयोग मात्रै भएको पनि दाबी गरे।
थापाले मुख्यमन्त्रीमा नियुक्त भएका केदार कार्कीलाई चार दलिय गठबन्धनकै साथ रहने पनि स्पष्ट पारे। आजै मात्र नेकपा एमालेका सांसदहरूको समर्थनमा नेपाली कांग्रेसका सांसद केदार कार्की कोशी प्रदेशको मुख्यमन्त्रीमा नियुक्त भएका थिए।
