सुदूरपश्चिमबाट अध्ययनका लागि इजरायल गएका ७ विद्यार्थी मारिएका छन्।
इजरायलको द्वन्द्वग्रस्त क्षेत्र सेदोत नेगेभको किवुज अलुमिनमा हमासको आक्रमणमा परेर सुदूरपश्चिमबाट गएका ७ विद्यार्थी मारिएका हुन्। मारिनेमा सबै छात्र हुन्। इजरायलस्थित नेपाली दूतावासले आइतबार विज्ञप्ति जारी गरेर सुदूरपश्चिमका ७ सहित १० जना मारिएको पुष्टि गरेको छ। एक जना बेपत्ता छन्। घाइते चार जनाको स्थानीय अस्पतालमा उपचार भइरहेको छ भने दुई जना सकुशल छन्।
मृतकको शव नेपाल पठाउनका लागि इजरायल सरकारसँग आवश्यक समन्वय गरिरहेको नेपाली दूतावासले जनाएको छ। मारिनेमा घोडाघोडी नगरपालिका–४ का नारायणप्रसाद न्यौपाने, जयपृथ्वी नगरपालिका–६ बझाङका गणेशकुमार नेपाली, बौनिया–३ कैलालीका आशिष चौधरी, लेकम–५ दार्चुलाका दीपेशराज बिष्ट, पाचनली–३ डोटीका राजन फुलरा, लमिखल–८ डोटीका पदम थापा र मालिकार्जुन–४ दार्चुलाका लोकेन्द्रसिंह धामी रहेका छन्।
स्थानीय अस्पतालमा टीकापुर–९ कैलालीका धनबहादुर चौधरीको उपचार भइरहेको छ। साथै भीमदत्त नगरपालिका–३ कञ्चनपुरका विपिन जोशी बेपत्ता छन भने त्रिशक्ति–४ भजनी कैलालीका वीरेन्द्र चौधरी सुरक्षित छन्। ती विद्यार्थीहरू गत भदौ १८ र १९ गते प्रयोगात्मक सिकाइका लागि ११ महिनाको ‘अर्न एन्ड लर्न प्रोग्राम’ का लागि सेदोत नेगेभ क्षेत्रमा पुगेका थिए।
मारिएका छन्। आशिष ११ महिनापछि इजरायलबाट फर्किने गरी गएका थिए।
छोरासँग सम्पर्क टुटेपछि जोशी परिवारमा रुवावासी
कञ्चनपुरको भीमदत्त नगरपालिका–३ का विपिन जोशीको परिवार चिन्तामा डुबेको छ। शनिबारपछि छोरासँग सम्पर्क नभएकाले आमा पदमा निकै चिन्तामा छिन्। शिक्षण पेशामा संलग्न उनका आमाबुबा बैतडीको रिमबाट केही वर्षअगाडि भीमदत्त नगरपालिका–३ मा बसाइँ सरेका थिए। आमा पदमा बेदकोट नगरपालिका–९ सुन्दरपुरस्थित उदयदेव माध्यमिक विद्यालयमा पढाउछिन्।
बुबा शिक्षणको क्रममा बझाङमा छन्। आमा र छोरी मात्रै भीमदत्त नगरपालिका–३ मा बसोबास गर्छन्। विपिन गत भदौ अन्तिम साता ‘लर्न एण्ड अर्न’ कार्यक्रमअन्तर्गत् इजरायल गएका थिए। शनिबारदेखि बेपत्ता उनको अवस्था अझै अज्ञात छ। परिवारले चाँडो खोजी उद्धार गरेर घर फिर्ता ल्याउन सरकारलाई आग्रह गरेको छ। इजरायलविरुद्ध प्यालेस्टाइनी विद्रोही समूह हमासले गरेको आतङ्कवादी आक्रमणमा १० नेपाली विद्यार्थी मारिएका छन्।
