शुभेच्छा खनाल
उनी फूल थिन, म सुन्दर कोपिला थिए
मेरी आमा आफ्नी भएर पनि अर्काकी थिइन्……
उनलाई नटिप्नु थियो न चुड्नु थियो, के थियो खै
बा काे प्रेम थियो या पागलपन थियो?
चोखो फूल मन मन्दिरमा चढाउनु थियो…
थाहा छैन, यो पाप थियो या पुन्य थियो ।
बु….हारी नामको रस चरक्क निचोरिन् र आफैले पिइन्..
किनारमा बसेर टलटल बग्दै थिइन्… जिन्दगीको खोलीबाट खुसी बगेर गएको हेर्दै थिइन् ।
रुँदा विकल्प नभेटेपछि,
अघेनी बाट सर्पले झै लखेटीएपछि,
संघर्षका फूल फुल्दा फुल्दै टपक्कै टिपिइएपछि,
उनी, बलेनिको एक्लिएकी पानीको थोपा हुन पुग्दछिन्……!
मलाई थाहा छ उनीसँग थुप्रो ज्ञान छ
आफ्नो पाठेघर कुहिएको छ र पनि
सासुको फुटेको खुट्टामा ध्यान छ
कैयौं ठाउँमा च्यातिएकी, कैयौं ठाउँमा मिचिएकी, मुस्कानको पर्दाले पिडा थिचेकी
साथी, आऊ उनका दुई बात गरौं …संयोगमा संवाद गरौं ।
समाजको नियम पालेर पाल्तु कुकुर झै भएकी छिन्
उनलाई दुनियाले बाँच्न सिकाएको छ र पो आफूलाई खोज्न भुलेकी हुन्न
तर,यतै कतै बेवास्ता मा बिलाएकी छिन्
