धनगढी उपमहानगरपालिकाले लिएको आधारभूत तह कक्षा ८ को वार्षिक परीक्षामा विभिन्न ६ विद्यालयका ३/३ विद्यार्थी मात्रै पास भएका छन्। विगतका वर्षभन्दा व्यवस्थित हिसावले परीक्षा सञ्चालन गरेको उपमहानगरमा पास हुने विद्यार्थीको प्रतिशत भने निकै कम छ।
शैक्षिक सत्र २०७९ का लागि ४ हजार ६ सय ३८ विद्यार्थीले कक्षा ८ को परीक्षा दिएकामा केबल एक हजार ५ सय ३ विद्यार्थी मात्र पास भएका हुन्। जुन कूल सहभागीको ३२ दशमलव ४१ प्रतिशत हो। धनगढीमा ३/३ जना विद्यार्थी पास हुने ६ वटा विद्यालय मध्ये ५ वटा सामुदायिक हुन् भने एउटा नीजि विद्यालयको हो। सामुदायिक विद्यालयमा धनगढी–६ रघुनगरको वासुदेवी माध्यमिक विद्यालयका ३ विद्यार्थी पास भएका छन्।
यो विद्यालयबाट ६३ जना विद्यार्थी परीक्षामा सहभागी भएका थिए। धनगढी–१६ रामपुरको शिव माध्यमिक विद्यालयका २३ जना परीक्षार्थीमा २० जना ननग्रेड भएका छन्। धनगढी–१४ सी गाउँको सर्वोदय माध्यमिक विद्यालयका ४० जना परीक्षार्थीमा ३७ जना अनुत्तीर्ण भएका छन् भने ‘बी’ गाउँको पञ्चोदय माध्यमिक विद्यालय ३० विद्यार्थीमा २७ अनुत्तीर्ण भएका छन्। धनगढी–१२ ‘सी’ गाउँको शारदा माध्यमिक विद्यालयका ४३ परीक्षार्थीमा ४० जना ननग्रेड भएका छन्।
