काठमाडौँ, १६ फागुन । शत प्रतिशत हकप्रद शेयर निष्काशन गर्ने घोषणा गरेको माथिल्लो तामाकोशी जलविद्युत आयोजनाले हकप्रद शेयर जारी गर्न पाउने भएको छ ।
दोलखा जिल्लामा सम्पन्न भएको ४५६ मेघावाट क्षमता रहेको अपर तामाकोशी जलविद्युत आयोजनाले शत प्रतिशत हकप्रद शेयर जारी गर्न स्वीकृति प्रदान गर्नको लागि नियमनकारी निकाय विद्युत नियमन आयोगमा निवेदन दिएको थियो । आयोगको मंगलबार बसेको १८७औं बैठकले कम्पनीलाई शत प्रतिशत हकप्रद निष्काशन गर्न अनुमति दिने निर्णय भएको हो । कम्पनीको गत असार ३० गते बिहीबार बसेको सञ्चालक समितिको बैठकले हाल कायम रहेको चुक्ता पूँजीको १ बराबर १ को अनुपातमा हकप्रद शेयर जारी गर्न साधारण सभामा प्रस्ताव गरेको थियो ।
कम्पनीको भदौ ३ गते नेपाल प्रज्ञा प्रतिष्ठानमा सम्पन्न साधारण सभाले १ बराबर १ शेयरको अनुपातमा अर्थात शत प्रतिशत हकप्रद शेयर निश्काशन गर्ने प्रस्ताव पारित गरेको थियो । अब उक्त हकप्रद शेयर धितोपत्र बोर्डबाट स्वीकृति भएपछी निष्कासन गरिनेछ ।
अपर तामाकोशीले जलविद्युत आयोजनाले गत वर्षदेखि विजुली उत्पादन गर्दै आइरहेको छ ।
हाल कम्पनीको चुक्ता पूँजी १० अर्ब ५९ करोड रुपैयाँ रहेको छ । शत प्रतिशत हकप्रद निष्काशन पश्चात कम्पनीको चुक्ता पूँजी २१ अर्ब १८ करोड रुपैयाँ पुग्नेछ ।