चरिकोट, १५ फागुन । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी, दोलखाले महङ्गी र चर्को ब्याज विरुद्ध दोलखाको सदरमुकाम चरिकोटमा विरोध प्रदर्शन गरेको छ । लघुवित्त, बैँक, सहकारीको चर्को ब्याज तथा मिटरब्याजले आम सर्वसाधरण मारमा परेको र जनताल महङ्गी धान्न नसक्ने अबस्थामा पुगेको भन्दै सोमबार दिउँसो नेकपाले सदरमुकाम चरिकोटको सातदोबाटोमा बिरोध प्रदर्शन गरेको हो ।
विरोध प्रदर्शनमा नेकपा दोलखाका जिल्ला इन्चार्ज अर्जुन योगी, दोलखा जिल्ला सेक्रेटरी राजकुमार लामिछाने, नेकपा दोलखा पूर्व जिल्ला संयोजक राजन धनुके, जिल्ला सदस्य सिताराम उप्रेती लगायतले मन्तव्य राख्दै बढ्दो महङ्गी, भ्रष्टाचार, वित्तिय संस्थाहरुको चर्काे ब्याज तथा मिटरब्याजले जनता त्रसित बनाएको, उद्योग व्यवसायहरु बन्द हुने अवस्थामा पुगेकोले तुरुन्त सरकारले सम्बोधन गर्नुपर्ने र यथाशीघ्र समाधान नगरे भ्रष्टाचार, र चर्को ब्याज विरुद्ध जनताको साथमा आन्दोलनको आँधीबेरी ल्याउने चेतावनी दिनुभएको थियो । बिरोध कार्यक्रममा नेकपा दोलखाका नेता, कार्यकर्ता तथा सर्वसाधारणहरुको उपस्थिति रहेको थियो । नेकपा दोलखाले भ्रष्टाचार, महंगी र चर्को ब्याज विरुद्ध जिल्लामा चरणबद्ध प्रदर्शन गरिरहेको छ ।
