तमिलनाडुका मुख्यमन्त्री सी.जोसेफ विजयले महिलाका लागि निःशुल्क बस यात्रा योजनाको विस्तार गर्ने घोषणा गरेका छन्।सोमबार विधानसभा बैठकमा घोषणा गर्दै मुख्यमन्त्री विजयले अब महिलाले सहरी क्षेत्रमा सञ्चालन हुने एक्सप्रेस र डिलक्स सरकारी बसमा समेत निःशुल्क यात्रा गर्न पाउने बताए।
त्यस्तै उपनगरीय तथा पहाडी क्षेत्रमा नियमित भाडा लाग्ने सरकारी बसमा पनि महिलाबाट भाडा नलिइने उनले जानकारी दिए। मुख्यमन्त्री विजयका अनुसार निःशुल्क बस यात्राको सुविधा लिन उमेरको कुनै सीमा तोकिने छैन। त्यस्तै यात्राको संख्यामा पनि कुनै सीमा नहुने भएको छ।महिलाका लागि निःशुल्क बस यात्रा योजना आगामी २ अक्टोबर अर्थात् गान्धी जयन्तीका दिनदेखि लागू हुनेछ। योजनाको विस्तारसँगै राज्य सरकारमाथि वार्षिक करिब ६ हजार करोड रुपैयाँ अतिरिक्त वित्तीय भार पर्ने बताइएको छ।
यसैबीच मुख्यमन्त्री विजयले परन्दुर ग्रीनफिल्ड विमानस्थल परियोजना बन्द गर्ने घोषणा पनि गरेका छन्। उक्त परियोजनाको स्थानीय किसानले तीव्र विरोध गर्दै आएका थिए। किसानहरूले आफ्नो खेतीयोग्य जमिन विमानस्थल निर्माणका लागि दिन अस्वीकार गर्दै आएका थिए।
