७ असार, काठमाडौं । नेपाली कांग्रेसका सभापति शेरबहादुर देउवाले सभापतिका आकांक्षी विमलेन्द्र निधिलाई फकाउन थप प्रयत्न नगर्ने संकेत गरेका छन् । बरु महामन्त्री शशांक कोइराला वा पूर्व महामन्त्री कृष्णप्रसाद सिटौलाको साथ खोजेका छन् ।
आगामी भदौ तेस्रो साता हुने १४ औं महाधिवेशनमा फेरि सभापतिमा उम्मेदवारी दिने तयारीमा रहेका देउवाले शनिबार निधिलाई बोलाएर सहयोग मागेका थिए । तर उपसभापति निधिले आफू पनि सभापतिमा उठ्ने भन्दै देउवालाई उम्मेदवारी नदिन सुझाए । संस्थापन समूहबाटै दुई जना उम्मेदवार हुने देखिएपछि नेताहरुले निधिसँग सम्वाद गर्न देउवालाई सुझाव दिएका थिए ।
